یوں تو پہلے بھی ہوئے اُس سے کئی بار جدا لیکن اب کے نظر آتے ہیں کچھ آثار جدا

 یوں تو پہلے بھی ہوئے اُس سے کئی بار جدا

لیکن اب کے نظر آتے ہیں کچھ آثار جدا

گر غم سود و زیاں ہے تو ٹھہر جا اے جاں

کہ اِسی موڑ پہ یاروں سے ہوئے یار جدا

دو گھڑی اُس سے رہو دُور تو یوں لگتا ہے

جس طرح سایہء دیوار سے دیوار جدا

یہ جدائی کی گھڑی ہے کہ جھڑی ساون کی

مَیں جدا گریہ کناں ابر جدا یار جدا

کج کلاہوں سے کہے کون کہ اے بے خبروں

طوق گردن سے نہیں طرۂ دستار جدا

کوئے جاناں میں بھی خاصا تھا طرحدار فراز

لیکن اُس شخص کی سج دھج تھی سرِ دار جدا

#احمد_فراز